गुजरात-महाराष्ट्र जोडणारी उधना-अमरावती विशेष रेल्वे २६ ऑक्टोबरपासून सुरू; दिवाळीच्या गर्दीत प्रवाशांना दिलासा, २४ ऑक्टोबरपासून आरक्षणाला सुरुवात
शेगाव : दिवाळी आणि आगामी सणांच्या पार्श्वभूमीवर रेल्वे प्रवाशांसाठी आनंदाची बातमी आहे. गुजरातमधील उधना (सुरत) ते महाराष्ट्रातील अमरावतीदरम्यान पश्चिम रेल्वे प्रशासनाकडून साप्ताहिक सुपरफास्ट विशेष रेल्वे सुरू करण्यात येत आहे. गाडी क्रमांक ०९०१३ उधना-अमरावती सुपरफास्ट स्पेशल २६ ऑक्टोबरपासून ३० नोव्हेंबर २०२६ पर्यंत दर सोमवारी धावणार आहे. या गाडीमुळे गुजरात आणि महाराष्ट्रादरम्यान प्रवास करणाऱ्या प्रवाशांना मोठा दिलासा मिळण्याची अपेक्षा आहे.
शेगाव, अकोला, मलकापूरच्या प्रवाशांसाठी महत्त्वाची सुविधा
या विशेष रेल्वेला महाराष्ट्रातील अनेक महत्त्वाच्या स्थानकांवर थांबे देण्यात आले आहेत. त्यामध्ये मलकापूर, नांदुरा, शेगाव, अकोला, मूर्तिजापूर आणि बडनेरा या स्थानकांचा समावेश आहे. त्यामुळे बुलढाणा आणि अकोला जिल्ह्यांसह विदर्भातील प्रवाशांना गुजरातकडे जाण्यासाठी अतिरिक्त रेल्वेसेवा उपलब्ध होणार आहे.
काय आहे रेल्वेचे वेळापत्रक?
गाडी क्रमांक ०९०१३ उधना-अमरावती सुपरफास्ट स्पेशल दर सोमवारी सकाळी ११ वाजून ३० मिनिटांनी उधना येथून सुटेल आणि त्याच दिवशी रात्री ९ वाजून २० मिनिटांनी अमरावती येथे पोहोचेल.
परतीच्या प्रवासासाठी गाडी क्रमांक ०९०१४ अमरावती-उधना विशेष रेल्वे दर सोमवारी रात्री ११ वाजून ३० मिनिटांनी अमरावती येथून सुटेल आणि मंगळवारी सकाळी ९ वाजून ३५ मिनिटांनी उधना येथे पोहोचेल.
या स्थानकांवर मिळणार थांबा
उधना, व्यारा, नवापूर, नंदुरबार, डोंडाईचा, सिंदखेडा, नरडाणा, अमळनेर, धरणगाव, जळगाव, भुसावळ, बोदवड, मलकापूर, नांदुरा, शेगाव, अकोला, मूर्तिजापूर, बडनेरा आणि अमरावती या मार्गावरील स्थानकांचा समावेश आहे.
२४ ऑक्टोबरपासून आरक्षण सुरू
या विशेष रेल्वेचे आरक्षण २४ ऑक्टोबर २०२६ पासून सुरू होणार असल्याची माहिती देण्यात आली आहे. प्रवाशांना आयआरसीटीसीच्या अधिकृत संकेतस्थळावर तसेच रेल्वेच्या पीआरएस आरक्षण काउंटरवरून तिकिटे आरक्षित करता येतील. या गाडीला विशेष रेल्वेचे भाडे लागू राहणार आहे.
ही विशेष रेल्वे २६ ऑक्टोबर, २ नोव्हेंबर, ९ नोव्हेंबर, १६ नोव्हेंबर, २३ नोव्हेंबर आणि ३० नोव्हेंबर अशा सहा सोमवारी धावणार आहे.
प्रवाशांना आवाहन : प्रवासाला निघण्यापूर्वी गाडीचे अद्ययावत वेळापत्रक, थांबे आणि तिकीट उपलब्धता एनटीईएस किंवा भारतीय रेल्वेच्या अधिकृत संकेतस्थळावर तपासून घ्यावी.
— OTT News
