ऐतिहासिक झिरो माईल स्तंभाजवळ वृद्ध महिलेची निर्घृण हत्या
नागपूर : शहराच्या मध्यवर्ती आणि ऐतिहासिक झिरो माईल स्तंभाजवळ मंगळवारी सकाळी एका वृद्ध महिलेचा रक्ताने माखलेला मृतदेह आढळून आल्याने प्रचंड खळबळ उडाली आहे. प्राथमिक तपासात महिलेवर अत्याचार झाल्याची आणि त्यानंतर तिची निर्घृण हत्या करण्यात आल्याची शक्यता वर्तवली जात आहे. ही घटना सीताबर्डी पोलीस ठाण्याच्या हद्दीत घडली असून, पोलिसांनी या गंभीर प्रकरणाची चौकशी सुरु केली आहे.
मिळालेल्या माहितीनुसार, मंगळवारी सकाळी नागपूर पोलीस नियंत्रण कक्षाला झिरो माईल स्तंभाजवळ एक महिला रक्तबंबाळ अवस्थेत मृत आढळल्याची माहिती मिळाली. या माहितीच्या आधारे सीताबर्डी पोलीस तात्काळ घटनास्थळी पोहोचले आणि मृतदेह ताब्यात घेऊन पोस्टमार्टमसाठी रुग्णालयात पाठवला. मृत महिला सुमारे 60 वर्षांपेक्षा जास्त वयाची असून, ती मानसिकदृष्ट्या अस्थिर असल्याचीही माहिती समोर आली आहे. सोमवारी रात्री आलेल्या पावसामुळे सदर महिला झिरो माईल स्तंभाजवळ थांबली होती. त्यावेळी ड्युटीवर असलेल्या ट्राफिक पोलिस कर्मचाऱ्यांनी तिला पाणी दिले होते. मात्र, त्यानंतर रात्रीच्या सुमारास कोणीतरी अज्ञात व्यक्तीने तिच्यावर बलात्कार करण्याचा प्रयत्न केला असावा, असा पोलिसांचा अंदाज आहे. महिलेने प्रतिकार केल्याने आरोपीने तिच्या डोक्यावर फर्शीने प्रहार करून तिची हत्या केली असावी, असा पोलिसांचा संशय आहे.
विशेष म्हणजे झिरो माईलसारख्या ऐतिहासिक आणि संवेदनशील ठिकाणी कुठल्याही प्रकारचे सीसीटीव्ही कॅमेरे बसवलेले नाहीत. त्यामुळे पोलिसांसमोर ही केस उकलणे हे एक मोठे आव्हान बनले आहे. तरीही पोलिसांनी परिसरातील इतर सीसीटीव्ही फुटेज तपासण्यास सुरुवात केली असून, आरोपीचा माग काढण्याचा प्रयत्न सुरू आहे. या प्रकरणात पुढील चौकशी केली जात आहे.
