आमदार रणधीर सावरकर यांच्या पुढाकाराने अकोल्यात भव्य ‘बियाणे महोत्सव २०२६’ उत्साहात

अकोला : खरीप हंगामाच्या पार्श्वभूमीवर शेतकऱ्यांना दर्जेदार व प्रमाणित बियाणे सहज उपलब्ध व्हावे, तसेच बोगस बियाण्यांच्या फसवणुकीपासून त्यांचे संरक्षण व्हावे, या उद्देशाने विधिमंडळाचे मुख्य प्रतोद तथा आमदार रणधीरभाऊ सावरकर यांच्या पुढाकाराने अकोला कृषी उत्पन्न बाजार समिती येथे ‘शेतकऱ्यांचे बियाणे शेतकऱ्यांसाठी’ या संकल्पनेवर आधारित भव्य ‘बियाणे महोत्सव २०२६’ उत्साहात पार पडला. या महोत्सवाचे आयोजन तालुका कृषी अधिकारी कार्यालय, अकोला यांच्या वतीने करण्यात आले होते.

महोत्सवाच्या उद्घाटनप्रसंगी बोलताना आमदार रणधीर सावरकर यांनी शेतकऱ्यांच्या अडचणी जाणून घेत शासन त्यांच्या पाठीशी खंबीरपणे उभे असल्याचा विश्वास व्यक्त केला. ते म्हणाले, “बियाणे हा शेतीचा आत्मा आहे. शेतकऱ्यांना योग्य दरात, योग्य वेळी आणि गुणवत्तापूर्ण बियाणे उपलब्ध झाले तरच उत्पादनात वाढ होऊन शेती आर्थिकदृष्ट्या सक्षम होईल. बोगस बियाण्यांमुळे होणारे नुकसान टाळण्यासाठी अशा महोत्सवांची नितांत गरज आहे.”

या बियाणे महोत्सवात शेतकऱ्यांसाठी विविध सुविधा उपलब्ध करून देण्यात आल्या. त्यामध्ये—

एकाच ठिकाणी प्रमाणित बियाणे : सोयाबीन, कापूस, तूर, मूग, ज्वारीसह विविध पिकांच्या सुधारित वाणांचे दर्जेदार बियाणे उपलब्ध.

कृषी तज्ज्ञांचे मोफत मार्गदर्शन : जमिनीच्या प्रकारानुसार योग्य वाणांची निवड, पेरणीचे नियोजन, खत व पीक व्यवस्थापनाबाबत कृषी अधिकाऱ्यांनी सविस्तर मार्गदर्शन केले.

बोगस बियाण्यांवर प्रभावी आळा : शासकीय स्तरावर तपासणी केलेल्या प्रमाणित बियाण्यांमुळे शेतकऱ्यांना विश्वासार्ह पर्याय उपलब्ध झाला.

अनुदान व योजनांची माहिती : बियाणे व कृषीविषयक विविध शासकीय योजनांतील अनुदानाची माहिती थेट शेतकऱ्यांपर्यंत पोहोचविण्यात आली.

या महोत्सवाला तालुका कृषी अधिकारी भोर साहेब, उपसभापती ज्ञानेश्वर महल्ले, संचालक राजेश बेले, अभिमन्यु वक्टे, वैभव माहोरे, भरत काळमेघ, दिनकर वाघ, अंबादास उमाळे, निळकंठ खेळकर, दिगंबर गावंडे, देवेंद्र देवर, दिवाकर चांदुरकर, विठ्ठल चतरकर यांच्यासह मोठ्या संख्येने शेतकरी उपस्थित होते.

महोत्सवात सहभागी झालेल्या शेतकऱ्यांनी या उपक्रमाचे स्वागत करत समाधान व्यक्त केले. “एकाच ठिकाणी विश्वासार्ह आणि चांगल्या दर्जाच्या कंपनीचे बियाणे उपलब्ध झाले. बाजारपेठेपेक्षा वाजवी दरात बियाणे मिळाल्याने मोठा दिलासा मिळाला,” अशा भावना अनेक शेतकऱ्यांनी व्यक्त केल्या.

खरीप हंगामाच्या तोंडावर आयोजित करण्यात आलेला हा ‘बियाणे महोत्सव २०२६’ अकोला जिल्ह्यातील शेतकऱ्यांसाठी उपयुक्त ठरत असून, दर्जेदार बियाण्यांच्या उपलब्धतेबरोबरच आधुनिक शेतीविषयक मार्गदर्शनाचे प्रभावी व्यासपीठ ठरल्याचे चित्र पाहायला मिळाले.