रात्री पाय मोकळे करण्यासाठी गेला अन् ; पैश्याच्या वादातून मित्रानंच तरुणाला संपवलं
नागपूर: पारशिवनी तहसीलमध्ये असलेल्या कन्हान पोलीस ठाण्याच्या हद्दीत एक धक्कादायक हत्या झाली आहे. गहुहिवरा रोडवरील पानतावने महाविद्यालयाजवळ भिवगडे ले-आऊटमध्ये राहणाऱ्या महेंद्र बर्वे यांची मित्रानेच हत्या केली असल्याचे समोर आले. ही घटना रविवारी रात्री ११ ते १२ वाजताच्या सुमारास घडल्याचा अंदाज वर्तवला जात आहे.
महेंद्र बर्वे रात्री जेवून पाय मोकळे करण्यासाठी घराबाहेर पडला. त्यानंतर तो घरी आला नाही. त्याचा मृतदेह सोमवारी सकाळी मॉर्निंग वॉकला गेलेल्या नागरिकांना रस्त्याच्या कडेला आढळला. त्यांनी तातडीने कन्हान पोलिस स्थानकात या मृतदेहाविषयी माहिती दिली. घटनेची माहिती मिळताच कन्हान पोलीसांनी घटनास्थळी धाव घेतली. प्राथमिक तपासानुसार, ही हत्या धारदार शस्त्राने करण्यात आली असल्याची शक्यता वर्तवली गेली. महेंद्र नगरपालिकेत कंत्राटी कामगार होता आणि लोकांना व्याजाने पैसे देत होता त्यामुळेच त्याची हत्या झाली का अशी शंका उत्पन्न करण्यात येत होती. तपास सुरू करताच पोलिसांनी परिसरातील सीसीटीव्ही फुटेज तपासले आणि मृतकाच्या कुटुंबीय व मित्रपरिवाराची चौकशी केली. काही तासांतच पोलिसांनी मुख्य आरोपी तुषार राजेश गुरधे (कन्हान पिपरी) आणि त्याच्या तीन साथीदारांना ताब्यात घेतले. पकडलेल्या आरोपींपैकी एक अल्पवयीन असल्याचे समजते.
मृतक महेंद्र बर्वे आणि आरोपी तुषार गुरधे जवळचे मित्र होते. महेंद्र बर्वे हे व्याजावर पैसे देण्याचा व्यवसाय करत होते. या पैशांवरून दोघांमध्ये अनेक दिवसांपासून वाद सुरू होता. या वादातूनच तुषारने आपल्या तीन मित्रांसह महेंद्र बर्वेची हत्या केल्याचे उघड झाले आहे. कन्हान पोलिसांनी आरोपींना अटक करून पुढील तपास सुरू केला आहे.
