नागपुर: महिलेचा मध्यरात्री अचानक मृत्यू, शव घरातच, मुलांवर संशय
नागपूर: नागपूर शहरात एका महिलेचा मृतदेह आढळून आला आहे. शहरातील पारडी पोलीस ठाणे हद्दीतील पुनापूर रोडवरील कात्रे सोसायटीत एका महिलेचा संशयास्पद मृत्यू झाला आहे. या घटनेने परिसरात एकच खळबळ उडाली आहे. ५६ वर्षीय मुन्नीबाई सुरेश यादव, असे मृत महिलेचे नाव असल्याची माहिती आहे. मुन्नीबाई यादव या आपल्या दोन मुलांसोबत येथे राहत होत्या. त्यांच्या मृत्यूबाबत संशय व्यक्त केला जात असून पोलिसांनी याप्रकरणी तपास सुरू केला आहे.
मुन्नीबाई यादव आपल्या २८ वर्षीय मुलगा लक्ष्मण यादव याच्यासोबत कात्रे सोसायटीत राहत होत्या. लक्ष्मण हा मजूर म्हणून काम करतो, तर त्याचा मोठा भाऊ राजू यादव आपल्या कुटुंबासह त्यांच्या घराशेजारीच राहतो. रात्री उशिरा मुन्नीबाई यादव यांचा मृत्यू झाल्याची माहिती होती. घटनेची माहिती मिळताच स्थानिक नागरिकांनी पोलीस नियंत्रण कक्षाला कळवले. काही लोकांनी हा खून असल्याचा संशय व्यक्त करत मुलगा लक्ष्मण यानेच आईची हत्या केली असावी, असा अंदाज व्यक्त केला. याबाबत पारडी पोलिसांनी घटनास्थळी धाव घेतली. पोलिसांनी याप्रकरणी लक्ष्मण आणि त्याच्या मोठ्या भावाची चौकशी केली. मात्र, लक्ष्मणने खुनाचे आरोप फेटाळून लावले आहेत. तसेच, त्याच्या मोठ्या भावानेही या घटनेबाबत काहीही माहिती नसल्याचं सांगितलं.
पोलिसांनी प्राथमिक तपासादरम्यान पाहणी केली असता, मुन्नीबाई यांच्या मृतदेहावर कोणत्याही जखमेच्या खुणा आढळल्या नाहीत. त्यामुळे हा खून आहे की नैसर्गिक मृत्यू, याबाबत संभ्रम कायम आहे. पोलिसांनी मृतदेह शवविच्छेदनासाठी मेयो रुग्णालयात पाठवला असून, शवविच्छेदन अहवालानंतरच मृत्यूचे नेमके कारण स्पष्ट होईल. सध्या पारडी पोलिस या संपूर्ण प्रकरणाचा तपास करत असून, शवविच्छेदन अहवालाच्या आधारे पुढील कारवाई करण्यात येईल, असे पोलिस अधिकाऱ्यांनी सांगितले आहे.
