तीन एकरांतील कापसावर डल्ला; शेतकऱ्यांचे नुकसान, ग्रामीण भागात सतर्कतेची गरज
कुशल भगत | विशेष प्रतिनिधी
अकोट : शेतात रात्रंदिवस मेहनत करून पिकवलेल्या कापसावर चोरट्यांनी डल्ला मारण्याचे प्रकार ग्रामीण भागात समोर येत आहेत. अकोट तालुक्यातील पांतोडा शेतशिवारात रात्रीच्या अंधाराचा फायदा घेत कापूस चोरणाऱ्या पाच जणांपैकी एकाला ग्रामस्थांनी रंगेहात पकडले, तर अन्य चार जण पळून जाण्यात यशस्वी झाले. या प्रकरणी दहीहांडा पोलीस ठाण्यात पाच जणांविरुद्ध गुन्हा दाखल करण्यात आला आहे. या घटनेमुळे परिसरातील शेतकऱ्यांमध्ये चिंता व्यक्त होत असून, शेतकऱ्यांनी सतर्क राहण्याची गरज निर्माण झाली आहे.
टॉर्चचा उजेड दिसताच संशय; ग्रामस्थांची शेताकडे धाव
मिळालेल्या माहितीनुसार, पांतोडा येथील शेतकरी सारंग भिमराव घावट (वय ४५) हे आपल्या चुलत सासऱ्यांच्या, दिवंगत गणेश विश्वनाथ तळी यांच्या गट क्रमांक ३०२ मधील तीन एकर शेतात कापसाचे पीक घेतात.
१९ ऑक्टोबर २०२६ रोजी रात्री सुमारे ११:३० वाजता प्रथमेश राणे हे शेतात पाणी देण्यासाठी जात असताना त्यांना सारंग घावट यांच्या शेतात टॉर्चचा उजेड दिसला. शेतात काहीतरी संशयास्पद सुरू असल्याचे लक्षात येताच त्यांनी तातडीने घावट यांना फोन करून माहिती दिली.
यानंतर सारंग घावट यांच्यासह शुभम नांदुरकर, अक्षय भांडेकार, हर्शल तराळे, नंदकिशोर तराळे, देवकिसन तळी, गोकुळ तळी आणि इतर ग्रामस्थांनी शेताकडे धाव घेतली. टॉर्चच्या प्रकाशात पाहणी केली असता, पाच जण शेतातील कापूस वेचताना दिसून आल्याचे फिर्यादीत नमूद करण्यात आले आहे.
ग्रामस्थांना पाहताच चौघे पसार; एकाला पकडले
ग्रामस्थ जवळ येत असल्याचे लक्षात येताच मारोती टाकसाळे, गणेश ढवळी, किसना नरोकार आणि मंगेश वडाळ हे चौघे अंधाराचा फायदा घेऊन पळून गेले. मात्र, ग्रामस्थांनी पाठलाग करून भिमराव राजाराम साळंके याला पकडले.
त्याच्याकडून सुमारे २० किलो वेचलेला कापूस, ज्याची किंमत अंदाजे २ हजार रुपये आहे, जप्त करण्यात आल्याची माहिती आहे.
एक क्विंटल कापूस चोरीला गेल्याचा अंदाज
शेताची पाहणी केली असता, तीन एकरांतील कापसाच्या पिकातून अंदाजे एक क्विंटल कापूस चोरीला गेल्याचे समोर आले. या कापसाची एकूण किंमत सुमारे १० हजार रुपये असल्याचे फिर्यादीत नमूद करण्यात आले आहे.
पाच जणांविरुद्ध गुन्हा दाखल
शेतकरी सारंग घावट यांच्या फिर्यादीवरून दहीहांडा पोलीस ठाण्यात भिमराव राजाराम साळंके, मारोती टाकसाळे, गणेश ढवळी, किसना नरोकार आणि मंगेश वडाळ या पाच जणांविरुद्ध भारतीय न्याय संहिता (BNS), २०२३ च्या कलम ३०३(२) व ३(५) अन्वये गुन्हा क्रमांक ०४८९/२०२६ नोंदवण्यात आला आहे.
ठाणेदार गोपाल ढोले यांच्या मार्गदर्शनाखाली या प्रकरणाचा पुढील तपास सुरू आहे.
शेतकऱ्यांनी सतर्क राहण्याचे आवाहन
कापूस हे शेतकऱ्यांच्या उत्पन्नाचे महत्त्वाचे साधन असल्याने कापूस चोरीच्या घटनांमुळे शेतकऱ्यांचे आर्थिक नुकसान होऊ शकते. त्यामुळे शेतकऱ्यांनी शेतातील संशयास्पद हालचालींकडे लक्ष ठेवावे, शक्य असल्यास सामूहिक गस्त घालावी आणि कोणतीही संशयास्पद घटना आढळल्यास कायदा हातात न घेता तातडीने पोलिसांना कळवावे, अशी गरज व्यक्त होत आहे.
