मनाली मोरे | OTT
पुणे : महात्मा गांधी यांच्या सत्याग्रहाच्या मार्गाने पुण्यात गेल्या अकरा दिवसांपासून सुरू असलेल्या MPSC विद्यार्थ्यांच्या आंदोलनाला अखेर यश मिळाल्याचा दावा राष्ट्रवादी काँग्रेसचे आमदार रोहित पवार यांनी केला आहे. विद्यार्थ्यांची एकजूट, जिद्द आणि चिकाटीमुळे सरकारला मागण्यांवर सकारात्मक निर्णय घ्यावा लागल्याचे सांगत त्यांनी आंदोलनात सहभागी झालेल्या विद्यार्थ्यांचे अभिनंदन केले. तसेच आंदोलनाला पाठिंबा देणारे राजकीय नेते, सामाजिक कार्यकर्ते, माध्यमांचे प्रतिनिधी आणि विविध संघटनांचे आभार मानले.
न्या. दिलीप भोसले यांच्या अध्यक्षतेखाली चौकशी आयोग
रोहित पवार यांनी दिलेल्या माहितीनुसार, राज्य सरकारचे प्रतिनिधी म्हणून मंत्री शिवेंद्रराजे भोसले यांनी आंदोलनस्थळी भेट देऊन विद्यार्थ्यांशी चर्चा केली. त्यानंतर २०२१ पासूनच्या पेपरफुटीच्या प्रकरणांची चौकशी करण्यासाठी न्या. दिलीप भोसले यांच्या अध्यक्षतेखाली न्यायालयीन चौकशी आयोग स्थापन करण्याचा निर्णय घेण्यात आला. हा आयोग १९५२ च्या चौकशी कायद्यानुसार स्थापन करण्यात आल्याचे त्यांनी सांगितले.
या आयोगाच्या सचिवपदी सनदी अधिकारी तुकाराम मुंडे यांची नियुक्ती करण्यात आल्याचा उल्लेखही रोहित पवार यांनी केला. न्या. पी. डी. नाईक, पोलीस अधिकारी लखमी गौतम आणि सेवानिवृत्त अधिकारी गणेश पाटील यांचाही आयोगात समावेश असल्याचे त्यांनी नमूद केले. चौकशी पारदर्शक पद्धतीने व्हावी, यासाठी MPSC अध्यक्ष भिमनवार यांनी रजेवर जाण्याचा निर्णय घेतल्याचेही पवार यांनी म्हटले.
ऑफलाइन परीक्षा, वेळेत निकाल आणि रिक्त पदे भरण्याबाबत निर्णय
विद्यार्थ्यांच्या मागण्यांबाबत सरकारने सकारात्मक भूमिका घेतल्याचे सांगताना रोहित पवार यांनी अनेक महत्त्वाच्या मुद्द्यांचा उल्लेख केला. यापुढील परीक्षा ऑफलाइन पद्धतीने घेणे, राजस्थानच्या धर्तीवर १०० रुपयांच्या कार्डवर वर्षभरातील परीक्षा देण्याची व्यवस्था, वेळेत निकाल जाहीर करणे, प्रतीक्षा यादी प्रसिद्ध करणे, रिक्त पदे भरणे आणि पदांच्या संख्येत वाढ करणे यांसह विद्यार्थ्यांच्या इतर मागण्या मान्य करण्यात आल्याचे त्यांनी सांगितले.
याशिवाय आंदोलनादरम्यान विद्यार्थ्यांवर दाखल झालेले गुन्हे मागे घेणे तसेच विद्यार्थी, क्लासचालक आणि टेलिग्राम चॅनल चालकांना बजावलेल्या नोटिसा मागे घेण्याबाबतही सरकारने सहमती दर्शविल्याचे पवार यांनी नमूद केले.
आंदोलनस्थळी विद्यार्थ्यांचा जल्लोष
पुण्यातील एस. एम. जोशी पुलावरील आंदोलनस्थळी उपस्थित हजारो विद्यार्थ्यांनी आंदोलनाच्या सांगतेनंतर जल्लोष केल्याचे रोहित पवार यांनी सांगितले. विद्यार्थ्यांच्या भावना व्यक्त करताना त्यांनी हा आनंद शब्दांच्या पलीकडचा असल्याचे म्हटले. विद्यार्थ्यांमध्ये परीक्षाप्रक्रियेबाबत निर्माण झालेली नाराजी आणि पारदर्शकतेची अपेक्षा या आंदोलनातून समोर आल्याचेही त्यांनी अधोरेखित केले.
सर्वपक्षीय नेते, सामाजिक संघटना आणि पोलिसांचे आभार
या आंदोलनाला पाठिंबा देणारे ज्येष्ठ नेते शरद पवार, खासदार सुप्रिया सुळे, विविध पक्षांचे पदाधिकारी, सामाजिक कार्यकर्ते, संस्था-संघटनांचे प्रतिनिधी, सोशल मीडिया इन्फ्लुएन्सर्स, पत्रकार आणि आंदोलनाचे संयोजक यांचे रोहित पवार यांनी आभार मानले.
आंदोलनादरम्यान विद्यार्थ्यांच्या जेवणाची व्यवस्था करणाऱ्या ज्ञात-अज्ञात व्यक्तींचेही त्यांनी विशेष आभार व्यक्त केले. तसेच मुख्यमंत्री देवेंद्र फडणवीस, मंत्री शिवेंद्रराजे भोसले आणि सहकार्याची भूमिका घेतलेल्या पोलीस प्रशासनाचे आभार मानले.
MPSC संस्थेची विश्वासार्हता पुन्हा प्रस्थापित होण्याची अपेक्षा
आंदोलनाच्या यशानंतर आता न्यायालयीन चौकशी आयोगाने वेळेत आणि निष्पक्ष पद्धतीने तपास पूर्ण करावा, अशी अपेक्षा रोहित पवार यांनी व्यक्त केली. चौकशीच्या माध्यमातून पेपरफुटीच्या प्रकरणांतील वस्तुस्थिती समोर येऊन दोषींवर कारवाई व्हावी आणि MPSC संस्थेची विश्वासार्हता पुन्हा प्रस्थापित व्हावी, असे त्यांनी म्हटले.
विद्यार्थ्यांच्या आंदोलनाचा एक भाग होण्याची संधी दिल्याबद्दल त्यांनी आंदोलक विद्यार्थ्यांचे आभार मानले. विद्यार्थ्यांची एकजूट आणि सातत्यपूर्ण संघर्ष यामुळे आपल्या मागण्यांसाठी लोकशाही मार्गाने आवाज उठवता येतो, असा संदेश या आंदोलनातून मिळाल्याचे त्यांच्या निवेदनातून स्पष्ट झाले.
