श्रीकांत पाचकवडे / Akola News
अकोला : भेसळयुक्त व निकृष्ट दर्जाच्या अन्नपदार्थांविरोधात सुरू असलेल्या विशेष मोहिमेअंतर्गत अन्न व औषध प्रशासनाच्या पथकाने बोरगाव मंजू येथील एका डेअरीवर कारवाई केली. तपासणीत संबंधित डेअरीकडे आवश्यक अन्न सुरक्षा नोंदणी व परवाना नसल्याचे आढळून आल्याने विक्री तात्काळ बंद करण्याचे आदेश देण्यात आले आहेत.
राज्याचे अन्न सुरक्षा आयुक्त तुकाराम मुंडे यांच्या मार्गदर्शनाखाली राज्यभर विशेष मोहीम राबविण्यात येत आहे. या मोहिमेअंतर्गत अकोला जिल्ह्यातील बोरगाव मंजू येथील ‘शेतकरी दूध डेअरी’ची तपासणी करण्यात आली. तपासणीदरम्यान डेअरीमधील दूध व दह्याचे नमुने घेऊन ते प्रयोगशाळेत विश्लेषणासाठी पाठविण्यात आले.
तपासणीत संबंधित आस्थापना अन्न सुरक्षा नोंदणीधारक नसल्याचे स्पष्ट झाल्यानंतर अन्न व औषध प्रशासनाने डेअरीची विक्री तात्काळ बंद करण्याचे आदेश दिले. प्रयोगशाळेचा अहवाल प्राप्त झाल्यानंतर पुढील आवश्यक कायदेशीर कारवाई करण्यात येणार असल्याचे प्रशासनाकडून सांगण्यात आले.
नागरिकांना शुद्ध, सुरक्षित व दर्जेदार अन्नपदार्थ उपलब्ध करून देण्यासाठी अशा प्रकारच्या तपासण्या नियमितपणे सुरू राहणार असल्याची माहिती सहायक आयुक्त (अन्न) दे. गो. वीर यांनी दिली.
भेसळविरोधी मोहिमेअंतर्गत करण्यात आलेल्या या कारवाईमुळे अन्न सुरक्षा नियमांचे पालन न करणाऱ्या व्यावसायिकांना इशारा मिळाला असून ग्राहकांच्या आरोग्याच्या दृष्टीने ही कारवाई महत्त्वाची मानली जात आहे.हेडलाईन:
परवाना नसलेल्या डेअरीवर धडक कारवाई; विक्री बंदचे आदेश, दूध-दह्याचे नमुने तपासणीसाठी पाठविले
