तोतया ‘CBI’ अधिकाऱ्यांचा पर्दाफाश! ‘अकोला एलसीबी ‘ ची १२ तासांत थरारक कामगिरी; २५ लाखांची संपूर्ण रक्कम हस्तगत

अकोला : तोतया ‘CBI’ अधिकारी असल्याचा बनाव करून एका व्यापाऱ्याकडून तब्बल २५ लाख रुपयांची रोख रक्कम लुटणाऱ्या दोन आरोपींना अकोला स्थानिक गुन्हे शाखेने (अकोला एलसीबी) अवघ्या १२ तासांत बेड्या ठोकत लुटलेली संपूर्ण रक्कम जप्त केली आहे. पोलिसांच्या या धडाकेबाज आणि वेगवान कारवाईमुळे जिल्हाभरात एलसीबीच्या कार्यक्षमतेचे कौतुक होत आहे.

दिनांक १९ जून २०२६ रोजी बाळापूर पोलीस ठाण्यात भारतीय न्याय संहिता (BNS) अंतर्गत गंभीर स्वरूपाचा गुन्हा दाखल करण्यात आला होता. खामगाव येथील एका व्यापाऱ्याला स्वतःला ‘CBI’ अधिकारी असल्याचे भासवत आरोपींनी धमकावून २५ लाख रुपयांची रोख रक्कम बळजबरीने हिसकावून नेली होती.

घटनेची माहिती मिळताच पोलीस अधीक्षक अर्चित चांडक यांनी प्रकरणाचे गांभीर्य ओळखून तातडीने स्थानिक गुन्हे शाखेचे पोलीस निरीक्षक नितीन लेव्हरकर यांना तपासाची सूत्रे हाती घेण्याचे निर्देश दिले. त्यानुसार एलसीबीची तीन विशेष पथके तयार करण्यात आली आणि आरोपींचा शोध घेण्यासाठी युद्धपातळीवर मोहीम सुरू करण्यात आली.

एलसीबीच्या पथकाने खामगाव ते बाळापूर मार्गावरील तब्बल ५० सीसीटीव्ही कॅमेऱ्यांचे फुटेज तपासले. तांत्रिक विश्लेषण, गोपनीय माहिती आणि खबऱ्यांकडून मिळालेल्या सूचनांच्या आधारे आरोपींची ओळख पटविण्यात आली.

तपासादरम्यान हार्दिक मनोजकुमार गुरबानी (२२, रा. सिंधी कॉलनी, खामगाव) आणि साहिल नंदकिशोर नथ्यानी (२५, रा. बीएचआर नगर, खामगाव) या दोघांना खामगाव येथून ताब्यात घेण्यात आले. चौकशीत त्यांनी गुन्ह्याची कबुली दिल्यानंतर पोलिसांनी त्यांना अटक केली.

अटक केलेल्या आरोपींकडून गुन्ह्यातील २५ लाख रुपयांची संपूर्ण रोख रक्कम, फिर्यादीचा १० हजार रुपये किमतीचा मोबाईल, तसेच २ लाख रुपये किमतीच्या दोन दुचाकी आणि ४० हजार रुपये किमतीचे दोन मोबाईल फोन असा एकूण २७ लाख ५० हजार रुपयांचा मुद्देमाल जप्त करण्यात आला.

विशेष म्हणजे, गुन्हा दाखल झाल्यानंतर अवघ्या १२ तासांच्या आत आरोपींना अटक करून लुटलेली शंभर टक्के रक्कम परत मिळविण्यात पोलिसांना यश आले. त्यामुळे ही कारवाई जिल्ह्यातील अलीकडच्या काळातील सर्वात यशस्वी तपास मोहिमांपैकी एक मानली जात आहे.

या उल्लेखनीय कामगिरीबद्दल पोलीस अधीक्षक अर्चित चांडक यांनी स्थानिक गुन्हे शाखेच्या तपास पथकाला २५ हजार रुपयांचे रोख बक्षीस जाहीर केले आहे.

सदर कारवाई पोलीस अधीक्षक अर्चित चांडक, अपर पोलीस अधीक्षक चंद्रकांत रेड्डी यांच्या मार्गदर्शनाखाली पोलीस निरीक्षक नितीन लेव्हरकर यांच्या नेतृत्वाखालील एलसीबीच्या अधिकारी व कर्मचाऱ्यांनी यशस्वीपणे पार पाडली. पुढील तपास बाळापूर पोलीस करीत आहेत.

“गुन्हेगार कितीही चलाख असला, तरी कायद्याच्या कचाट्यातून सुटू शकत नाही,” याचीच प्रचिती अकोला एलसीबीच्या या कारवाईने पुन्हा एकदा दिली आहे.