मुख्यमंत्री देवेंद्र फडणवीस यांच्यासोबत कारंजा, मंगरूळपीर आणि मालेगाव तालुक्यांचा दौरा
श्रीकांत पाचकवडे
अकोला : शेतकऱ्यांच्या अडचणी जाणून घेण्यासाठी आमदार रणधीर सावरकर यांनी शेतकऱ्यांच्या बांधावर धाव घेतली. मुंबईहून परतल्यानंतर त्यांनी मुख्यमंत्री देवेंद्र फडणवीस यांच्यासोबत कारंजा, मंगरूळपीर आणि मालेगाव तालुक्यांतील नुकसानग्रस्त भागांची पाहणी केली. यावेळी शेतकऱ्यांशी थेट संवाद साधत त्यांच्या समस्या जाणून घेतल्या आणि शासनाकडून मदतीसाठी पाठपुरावा करण्याचे आश्वासन दिले.
भाजपचे वाशिम जिल्हा संघटन प्रभारी म्हणून जबाबदारी सांभाळणारे आमदार सावरकर यांनी सकाळपासून विविध गावांमध्ये शेतकऱ्यांच्या बांधावर जाऊन नुकसानीची माहिती घेतली. पिकांची परिस्थिती, शेतकऱ्यांच्या अपेक्षा तसेच प्रशासनाकडून आवश्यक असलेल्या उपाययोजनांबाबत त्यांनी संबंधितांकडून माहिती घेतली.
मुख्यमंत्र्यांसोबत संयुक्त पाहणी
मुख्यमंत्री देवेंद्र फडणवीस यांच्यासोबत तिन्ही तालुक्यांमध्ये झालेल्या पाहणीदरम्यान शेतकऱ्यांनी आपल्या अडचणी मांडल्या. नैसर्गिक संकटामुळे झालेल्या नुकसानीच्या पार्श्वभूमीवर शासनाने आवश्यक ती मदत करावी, अशी अपेक्षा शेतकऱ्यांनी व्यक्त केली.
शेतकऱ्यांच्या भावना आणि स्थानिक पातळीवरील परिस्थिती शासनापर्यंत पोहोचवून आवश्यक उपाययोजनांसाठी पाठपुरावा करण्याची भूमिका आमदार सावरकर यांनी यावेळी मांडली.
‘शेतकऱ्यांची दिवाळी अंधारात जाणार नाही’
आमदार सावरकर म्हणाले, “शेतकरी हा देशाचा कणा आणि महाराष्ट्राची शान आहे. संकटाच्या काळात त्याच्या पाठीशी उभे राहणे हे आमचे कर्तव्य आहे. शासन शेतकऱ्यांना मदत करण्यासाठी आवश्यक प्रक्रिया राबवत आहे. शेतकऱ्यांची दिवाळी अंधारात जाऊ नये, यासाठी शासन प्रयत्नशील आहे.”
नैसर्गिक आपत्तीच्या परिस्थितीत करावयाच्या उपाययोजना, नुकसानीचे पंचनामे आणि मदतीसंदर्भातील प्रशासकीय प्रक्रिया याबाबतही त्यांनी माहिती दिली.
भाजप पदाधिकाऱ्यांची उपस्थिती
या पाहणी दौऱ्यात आमदार सईताई डहाके, खासदार अनुप धोत्रे, ज्येष्ठ नेते अनंतराव देशमुख, आमदार भावनाताई गवळी, आमदार श्यामभाऊ खोडे तसेच भाजप पदाधिकारी नरेंद्र गोलेच्छा, पुरुषोत्तम चितलांगे यांच्यासह अन्य पदाधिकारी उपस्थित होते.
टीका करण्यापेक्षा प्रत्यक्ष शेतकऱ्यांच्या बांधावर जाऊन त्यांची परिस्थिती जाणून घेणे आणि त्यांच्या समस्या शासनापर्यंत पोहोचवणे आवश्यक असल्याचे आमदार सावरकर यांनी यावेळी नमूद केले.
