श्रीकांत पाचकवडे
अकोला : अकोला जिल्हा परिषदेच्या मुख्य कार्यकारी अधिकारी (CEO) पदावरील प्रतीक्षा अखेर संपुष्टात आली असून भारतीय प्रशासकीय सेवेचे (IAS) युवा अधिकारी अनय नावंदर यांनी आज अकोला जिल्हा परिषदेच्या मुख्य कार्यकारी अधिकारीपदाचा पदभार स्वीकारला. राज्य शासनाच्या सामान्य प्रशासन विभागाने त्यांच्या नियुक्तीचे आदेश जारी केल्यानंतर त्यांनी तातडीने रुजू होत कारभार हाती घेतला आहे.
यापूर्वी अनय नावंदर हे नाशिक विभागातील तळोदा येथे एकात्मिक आदिवासी विकास प्रकल्पाचे प्रकल्प अधिकारी तथा सहायक जिल्हाधिकारी म्हणून कार्यरत होते. आदिवासी विकास क्षेत्रातील काम, प्रशासनातील पारदर्शकता आणि लोकाभिमुख कार्यपद्धतीमुळे त्यांनी स्वतंत्र ओळख निर्माण केली आहे.
शासनाच्या आदेशानुसार, त्यांनी आपल्या सध्याच्या पदाचा कार्यभार विभागीय आयुक्त, नाशिक विभाग यांच्या सल्ल्यानुसार अन्य अधिकाऱ्याकडे सुपूर्द करून अकोला जिल्हा परिषदेत रुजू होण्याची प्रक्रिया पूर्ण केली. राज्य शासनाचे अतिरिक्त मुख्य सचिव सुभाष उमराणीकर यांच्या स्वाक्षरीने हा नियुक्ती आदेश निर्गमित करण्यात आला आहे.
अकोला जिल्हा परिषद ही ग्रामीण विकास, शिक्षण, आरोग्य, पाणीपुरवठा, महिला व बालकल्याण यांसारख्या महत्त्वाच्या विभागांची अंमलबजावणी करणारी प्रमुख यंत्रणा आहे. त्यामुळे नव्या सीईओंच्या नियुक्तीकडे जिल्ह्यातील प्रशासकीय, राजकीय तसेच सामाजिक वर्तुळाचे विशेष लक्ष लागले होते.
अनय नावंदर यांच्या आगमनामुळे जिल्हा परिषदेच्या प्रशासनाला नवी ऊर्जा मिळणार असल्याची भावना व्यक्त केली जात आहे. प्रलंबित विकासकामांना गती, योजनांच्या अंमलबजावणीत अधिक परिणामकारकता आणि पारदर्शक निर्णयप्रक्रिया यावर त्यांच्या कार्यकाळात विशेष भर राहण्याची अपेक्षा व्यक्त होत आहे.
ठळक मुद्दे
अकोला जिल्हा परिषदेच्या मुख्य कार्यकारी अधिकारीपदी IAS अधिकारी अनय नावंदर रुजू.
आज पदभार स्वीकारून कारभाराची सूत्रे हाती.
तळोदा येथील एकात्मिक आदिवासी विकास प्रकल्पाचे प्रकल्प अधिकारी म्हणून यापूर्वी कार्यरत.
अतिरिक्त मुख्य सचिव सुभाष उमराणीकर यांच्या स्वाक्षरीने नियुक्ती आदेश.
जिल्हा परिषदेच्या विकासकामांना आणि प्रशासनाला नवी गती मिळण्याची अपेक्षा.
