वाळलेली सोयाबीन कार्यालयाच्या गेटवर फेकून संताप व्यक्त; हेक्टरी १ लाख रुपयांच्या मदतीसाठी तुपकर आक्रमक, खामगाव-शेगाव-मलकापूर-लोणारमध्येही आंदोलनाचा धडाका
बुलढाणा (प्रतिनिधी) : पावसाने मोठा खंड दिल्यामुळे सोयाबीनसह खरीप पिकांची अवस्था दयनीय झाली आहे. पिके करपल्याने शेतकऱ्यांसमोर मोठे आर्थिक संकट उभे राहिले असून, शेतकऱ्यांना तातडीने मदत मिळावी यासाठी बुलढाणा जिल्ह्यात शेतकरी संघटनांनी आंदोलनाचा एल्गार पुकारला.
जिल्हाधिकारी कार्यालयासमोर शेतकऱ्यांचा आक्रोश
राज्यात तातडीने कोरडा दुष्काळ जाहीर करून शेतकऱ्यांना हेक्टरी १ लाख रुपये नुकसानभरपाई द्यावी, या प्रमुख मागणीसाठी रविकांत तुपकर यांच्या नेतृत्वातील क्रांतिकारी शेतकरी संघटना आणि स्व. शरद जोशी प्रणित शेतकरी संघटनेने जिल्हाधिकारी कार्यालयासमोर जोरदार निदर्शने केली. आंदोलनादरम्यान सरकारविरोधात घोषणाबाजी करण्यात आली.
करपलेली सोयाबीन जिल्हाधिकारी कार्यालयाच्या गेटवर
आंदोलनाचे लक्ष वेधून घेणारे दृश्य पाहायला मिळाले. दुष्काळामुळे करपलेल्या सोयाबीनची झाडे थेट जिल्हाधिकारी कार्यालयाच्या गेटसमोर आणून टाकण्यात आली. तसेच वाळलेली सोयाबीनची झाडे जिल्हाधिकाऱ्यांना देत शेतकऱ्यांच्या शेतातील विदारक परिस्थितीचा आरसाच प्रशासनासमोर ठेवण्यात आला.
क्रांतिकारी शेतकरी संघटनेचे संस्थापक रविकांत तुपकर स्वतः आंदोलनात सहभागी झाले. त्यांनी जिल्हाधिकाऱ्यांशी चर्चा करून शेतकऱ्यांच्या विविध मागण्यांचे निवेदन सादर केले. हे निवेदन जिल्हाधिकाऱ्यांमार्फत मुख्यमंत्री यांच्याकडे पाठविण्यात आले.
हेक्टरी १ लाख रुपयांची नुकसानभरपाई द्या
पावसाने मोठा खंड दिल्याने सोयाबीनसह खरीप पिकांचे मोठे नुकसान होत आहे. त्यामुळे राज्यात तातडीने कोरडा दुष्काळ जाहीर करून शेतकऱ्यांना हेक्टरी १ लाख रुपये नुकसानभरपाई द्यावी, अशी मागणी संघटनांनी केली.
वीज, ट्रान्सफॉर्मर आणि पीकविम्याचा प्रश्न सोडवा
शेतकऱ्यांना पूर्णवेळ वीज उपलब्ध करून द्यावी, जळालेले ट्रान्सफॉर्मर तातडीने बदलावे आणि रखडलेला पीकविमा प्रश्न मार्गी लावावा, अशी मागणीही निवेदनातून करण्यात आली. दुष्काळी परिस्थितीत पिकांना पाणी देण्यासाठी वीजपुरवठा सुरळीत असणे आवश्यक असल्याचे संघटनांनी म्हटले.
सरसकट कर्जमाफीची मागणी
शेतकऱ्यांची आर्थिक कोंडी लक्षात घेता सरसकट कर्जमाफी करावी, २०१९ पूर्वीच्या कर्जमाफीपासून वंचित राहिलेल्या शेतकऱ्यांचा त्यात समावेश करावा आणि नियमित कर्जफेड करणाऱ्या शेतकऱ्यांना २ लाख रुपयांचे प्रोत्साहन अनुदान द्यावे, अशी मागणी पुन्हा रेटण्यात आली.
कर्ज पुनर्गठन आणि सिबिलचा मुद्दाही उपस्थित
कर्ज पुनर्गठन तसेच रूपांतरित कर्जधारकांनाही मदतीच्या कक्षेत आणावे, अशी मागणी करण्यात आली. कर्जाच्या थकबाकीमुळे शेतकऱ्यांचा सिबिल खराब होऊन भविष्यातील कर्जाचे दरवाजे बंद होऊ नयेत, यासाठी केंद्र व राज्य सरकारने ठोस निर्णय घ्यावा, अशी भूमिका संघटनांनी मांडली.
मुख्यमंत्र्यांनी आरबीआयशी चर्चा करावी
शेतकऱ्यांच्या कर्जासंदर्भातील प्रश्न सोडविण्यासाठी मुख्यमंत्री देवेंद्र फडणवीस यांनी आरबीआयशी चर्चा करून बँकांना आवश्यक निर्देश द्यावेत, अशी मागणीही निवेदनातून करण्यात आली.
चार तालुक्यांतही क्रांतिकारीचा सरकारविरोधात एल्गार
बुलढाणा शहरापुरते हे आंदोलन मर्यादित राहिले नाही. जिल्ह्यातील विविध ठिकाणी क्रांतिकारी शेतकरी संघटनेच्या शिलेदारांनी शेतकऱ्यांच्या मागण्यांसाठी आंदोलन केले.
खामगावात शेकडो शेतकऱ्यांचा सहभाग
खामगावमध्ये क्रांतिकारीचे शिलेदार शुभम राऊत आणि निलेश गवई यांच्या पुढाकारातून उपविभागीय अधिकारी कार्यालयासमोर शेकडो शेतकऱ्यांनी आंदोलन केले. पिकांच्या नुकसानीची तातडीने दखल घेऊन मदत जाहीर करण्याची मागणी करण्यात आली.
शेगावमध्ये तहसील कार्यालयासमोर आंदोलन
शेगावमध्ये तालुकाप्रमुख राजेश शेळके आणि शहरप्रमुख संतोष खेर्डे यांच्या नेतृत्वात तहसील कार्यालयासमोर शेतकऱ्यांनी आंदोलन केले. यावेळी शेतकऱ्यांच्या मागण्यांकडे शासनाने गांभीर्याने पाहण्याची मागणी करण्यात आली.
मलकापूरमध्येही शेतकऱ्यांचा आक्रोश
मलकापूरमध्ये उपविभागीय अधिकारी कार्यालयासमोर सचिन शिंगोटे यांच्या नेतृत्वात शेतकऱ्यांनी आंदोलन केले. दुष्काळी परिस्थितीची पाहणी करून शेतकऱ्यांना तातडीने आर्थिक मदत देण्याची मागणी करण्यात आली.
लोणारमध्ये हलगी बजाव आंदोलन
लोणारमध्ये क्रांतिकारीचे सहदेव लाड यांच्या नेतृत्वात तहसील कार्यालयासमोर हलगी बजाव आंदोलन करण्यात आले. हलगीच्या दणदणाटातून सरकारने शेतकऱ्यांच्या प्रश्नांकडे तातडीने लक्ष द्यावे, असा इशारा देण्यात आला.
आंदोलनापूर्वी तुपकर थेट शेतकऱ्यांच्या बांधावर
दरम्यान, आंदोलनापूर्वी रविकांत तुपकर यांनी चिखली तालुक्यातील शेळगाव आटोळ, इसरुळ आणि देऊळगाव घुबे परिसरातील शेतशिवारात जाऊन दुष्काळी परिस्थितीची पाहणी केली. त्यांनी शेतकऱ्यांच्या बांधावर पोहोचून पिकांची पाहणी केली आणि शेतकऱ्यांशी प्रत्यक्ष संवाद साधला.
घोषणा नको, खात्यात प्रत्यक्ष मदत जमा करा
पावसाअभावी करपलेली पिके, हातातोंडाशी आलेले संकट आणि वाढती कर्जाची चिंता या पार्श्वभूमीवर सरकारने केवळ घोषणा न करता शेतकऱ्यांच्या खात्यात प्रत्यक्ष मदत जमा करावी, अशी मागणी आंदोलनातून करण्यात आली.
आंदोलन तीव्र करण्याचा तुपकरांचा इशारा
शेतकऱ्यांच्या प्रश्नांवर सरकारने तातडीने निर्णय घेतला नाही, तर आंदोलन आणखी तीव्र करून राज्यव्यापी आंदोलन करण्याचा इशारा रविकांत तुपकर यांनी दिला आहे. त्यामुळे आगामी काळात शेतकरी प्रश्नावर सरकार आणि शेतकरी संघटनांमध्ये संघर्ष आणखी तीव्र होण्याची शक्यता व्यक्त केली जात आहे.
शेतकरी आणि कार्यकर्त्यांची मोठी उपस्थिती
यावेळी देविदास कणखर, एकनाथ थूट्टे पाटील, दामोदर शर्मा, विनायक सरनाईक, रंजीत डोसे, मुरली महाराज येवले, राजू ठाकूर, रितेश पाटील, राजू शेटे, गणेश थुटे, अमोल मोरे, रामेश्वर अंभोरे, विठ्ठल वानखेडे, सुनील करांगळे, आत्माराम कुटे, विलास मुजमुले, दिनकर घुबे, रामू हिवराळे, अशोक डांगे, रामदास शिंदे, नंदकिशोर बारस्कर, पांडुरंग घुबे यांच्यासह असंख्य शेतकरी, शेतकरी चळवळीचे कार्यकर्ते आणि पदाधिकारी उपस्थित होते.
